رثاء في المغفور له بإذن الله  الاستاذ / سعد محمد الذويبي .. ابو منصور 

أنا هاجرٍ  للبوك  مـن قبل بضع  اشهور
رهيـن  الحظر والشـعر  ماعاد  نفطنله

حداني على نظْم الشعر والرثاء منصور
بعد شـفت  دمعة  عين  منصور  منهلّه

وأثر للرثاء والشـعر  دمّن  حَمر  ويفور
إذا   زادت   الأحـزان   والهـم   والعلّـه

سقاك  الحيا  ياحزم به  سيفنا  مقبور
طويته بشاش أبيض  ولا عاد ابا أسلّه

تركنـي   بنارٍ   تشـتعل   كنهـا   دافور
دوافيـر    صُناعٍ    للأضلاع     محتلّه

وياشلع  صدري دون  حربه ولاساطور
وياتل  قلبي  بيـن  الأضلاع   وا تلّه

الا ياوجودي  وجد مـن فاتها المظهور
خلوج ٍ ولدها مـات  والحال مختلّه

والا واهني  اللـي مـع  الهم  ماله  دور
ولا همّته   فرقا  ولا  يشـحنه   خِلّه

ويازوع  قلبـي زوع  حرّن  حداه  الجور
شهر في عسـام الجو والدرب مادلّه

عن العيـن  غاب  وضيّعه راعي الناظور
وتاه ابصحاري نجد يكفخ  ورا ظِلّه

علـى اللّـي ليا منّه مشى بأول الطابور
أميرٍ  يشـوق  العين بالفكر  والطلّه

اذا قال ننصتله  ويسمعله  اهل  الشور
ويدمح  خطأ المخطي  ويغفرله الزله

واذا قلت ابو منصورجاوب وهومشكور
وجاني علـى الموعد ولا يعرف الذلّه

قضينا  العمر  مابيـن الام وفرح وسرور
ولا انساه  طول العمر  والنفس معتلّه

أفُر الفكر فـي صفحة الذكريات ادهور
ولا أذكـر مـن المرحوم  نقصٍ ولا خِله

الأول  علـى فصله  ويشهدله  الجمهور
محنك ذكي وابيض من الشاشه اسجلّه

تذكرت مسراحي معه  قبل يبدأ  النور
وعمر الزهور  اللـّي قضيناه  والفَلّه

وفصلٍ  درسنابه  والاسـتاذ  والدكتـور
ودرسٍ  عليّه صعب  واخذ  منه حلّه

عسالك يابو منصور  بالخلد عال الدور
تعوّضك  عن  دار العنا  والتعب كله

وعهدٍ علـى نفسـي  تطمّن ياوجه النور
ليا اللـه  عطاني  عُمْر ماغيّر  المِلّه

لوقّف مع أولادك ولا أرضى علاهم جور 
ونرفع هموم الوقت والحمل نشتلّه

وياللـه  يامن  تعلم  الجَهْر  والمسـتور
يناجيك عبدك  وانت  يارب  تغفرله

كريمٍ ويبرأمن هل الكذب واهل الزور
وذِكرك  علـى  باله  يارحمن  ماملّه

د. حمود  محمد الذويبي