((( لا لا للعنصرية والتعصب القبلي ))))
نرفض أي استعلاء بين البشر ،، وكوننا مسلمين فنحن نؤمن بأنه ( لافضل لعربي على عجمي ولا لأبيض على اسود إلّا بالتقوى ) ،، يامن تكتبون وتتشدقون بين الحين والآخر !! للموت هيبه والعز لعتيبه ،، من غامد والقلب جامد ،، وخّر عن دربي تراني حربي ،، إمطيري و احسن من غيري ،، وغيرها من الجمل والعبارات التي باتت منتشره على صفحات الإنترنت وفي القنوات الفضائيه تكون عنواناً لتعصبٍ قبلي يطل برأسه من جديد ،، والمفارقة العجيبة أن عراب هذا التعصب هو جيل لم يعرف في حياته سوى معارك تومو وجيري ومغامرات بلايستيشن !! إلى متى ونحن العرب  .. والقبائل خاصة  ننظر إلى البشر من حولنا بتغاضي فاضي ،، وشموخ مشدوخ  ؟؟ نكثر الجدال وعلى سبيل المثال — كما قرأت ( الهند تملك عاشر أقوى جيش في العالم ، وتملك 5 آلاف قنبلة نووية، وهم من أخترعوا الهوتميل والـ USB، ودخلوا مجال المريخ قبل سنة بمركبة فضائية هندية 100%، وهي أكثر دولة لديها مصانع قطارات وسفن ،، ومنها أكثر رجال العالم ثراء ،، فوق كل هذا رئيس قوقل هندي، ورئيس مايكروسوفت هندي، ورئيس ماستر كارد هندي ) .
والعربي مازال يقول : شايفني هندي ؟

لا والله شايفك عربي .. هههههه

ياللـه  ياعـالم (ن) بالنفس وأحـوالها
وتدري قصار العلوم  وتدري اطوالها

إتْعـز  وتْذل  وتْنزّل  وترفع  خشـووم
والنـاس  تدريبهـا  وتقيّـم   أعمالهــا

ياللـه تحْفــظـ بلدنا  قبلـة  المسلميـن
واحفـظـ  بلاد الحرم  مـن  شـر عيّالهـا

وأيّد بنصرك  لراع الحزم في كل حـال 
( سـلمان ) قايـد   ركـايبنـا   وخيـّالهـا 

اللي جعل مملكتنا في مصف العظام
مابيـن  عشريـن  دولـه تُضرب أمثالها

امّابعد : يارموز  القوم  واهل الصلاح
الحرْب  مـن كلمة(ن) والنار بشعالهـا

لا  للتّعصب   ولا   للعنصريـه  مكـان
نصيحـةٍ (ن)  قلتها مـادوّر  ابْدالهــا

في مهرجان الشعر عند القبائل يزود
تمجـيد  للذات واللـه عـالم  أحوالهـا

قبايلٍ(ن) تذكر أيّام  الجهل والحروب
عـصابـة  الشّـر فـال اللـه   ولا  فالهـا

يقلون حنـّا  ذبحنـا  واستلبنا حـقوق
وتباهي  الناس  بالخسّـه  وبعمالهـا

كـلّن  يقل لي قبيلـه مالها مـن مثيـل
إمحلّلن دم  خـلقـه  سـالبن  مـالهـــا
 
إيمدّح افعال ربعه يوم جهل السنين
قـدّام  صـقر الجزيـره  يبتر إحبالهـا

ماحاربوافي سبيل الله ودحْرالطُغاه
والظلم  بفعالهـا يكـفي عـن أقوالهـا

يامادح الذات وينك يوم وقعت حنين
وين أنت يوم الخيول يصول خيالها 

أبنشدك عـن صلاح الدين والفاتحين
وعن بـدر والقادسيه منهم ابطالهـا ؟

الأندلس وين صارت ويـن طارق زياد؟
اللـّي  ركـز رايته  في عالي إجْبالـهـا

المجْـد ماهو بذكر البطش والموبقات
المجْـد   بالسّـيره  العطْـره  وموّالهـا

والعَقْل نعمـه  ولا يرقى  بليـّا عـلوم
وأعوذ بالله مـن النعرات واعضالهـا

إمزايـن  البل ماهُو لجل شب الفتيل
سُـبحان خلّاقهـا  وامرتّب  أشكالهـا

ثلثين بعض القبايل تستحق الضمان
والجهل والشـر  والتشويش بعيالهـا

الأغلبيه دواعـش واهْـل  فكـر  وظلال
ماهمّهُـم  حـاضـر   الأيـام   وإقبالهـا

حتى المساجد تأذّت من عيال الحرام
حضر المدن والأجانب تشجب افعالها

فـي عـهد سـلمان لاللطائفيـّه  وجُـود
ياجاهـليـن   الرجـال  وفكْـر عُـقّالـهــا

بعض الرياجيل وصلوللفضاوالنجوم
وبعـض القبايـل  تمدّح  فِعْـل جُهّـالهـا

تنافـس القـوم  بالتعليـم  والإخـترااع
ماهُـو  بالأمداح والاّ سـكْبة  اجمالهــا

ياناس خافومن الله يوم عرض الحساب
مـاينفع  النفـس غـير امْقابل  أعمالها

الدوله  اللي  لها الأنظار من كل صوب
السّلب والنهب  ماهُـو  سيرة  أبطالها

مكـه وطيبه لها المسلم يشـد  الرحال
هي قبلـة  المسلمين  وشدّت ارحالهـا

في وحْدة الصف كل الخير للمسلمين
ماهُو  بالأحزاب والنعـرات  وأهْـوالهـا 

قلته واناشاعر(ن)فكري يفوق الخيال
وأفكار بعض القبايـل  صدّت أقفالها

وإختامهـا بلغوا عني صريـح  الكلام
والناس  تعْـرف  مواقعهـا  ومنزالهـا

لا ( للتعصب ) ولا  للعنصريّـه  مكان
نصيحةٍ (ن)  قلتهـا  ماادوّر  إبدالهـا

       الكاتب / د - حمود بن محمد الثبيتي